पत्रा तालीम मंडळाचा गणेशोत्सव यंदा रंगणार विविध सांस्कृतिक कार्यक्रमांनी!

सोलापूर

पत्रा तालीम युवक, क्रीडा व सांस्कृतिक मंडळाच्या वतीने यंदाच्या गणेशोत्सवानिमित्त विविध धार्मिक, सांस्कृतिक, क्रीडा आणि सामाजिक उपक्रमांचे आयोजन करण्यात आले आहे. दरवर्षीप्रमाणे यंदाही पत्रा तालीम परिसरातील मानाच्या पणजोबा गणपतीची विधिवत प्रतिष्ठापना करण्यात येणार असून, गणेशोत्सवाच्या काळात विविध कार्यक्रमांची रेलचेल पाहायला मिळणार आहे.
गणेशोत्सवाच्या निमित्ताने परिसरातील महिला, मुले आणि मुलींसाठी विविध स्पर्धांचे आयोजन करण्यात आले आहे. यामध्ये अथर्वशीर्ष पठण, स्लो सायकल, चित्रकला स्पर्धा, डान्स स्पर्धा, वक्तृत्व स्पर्धा तसेच पोत्यातून उड्या मारणे अशा विविध उपक्रमांचा समावेश आहे. या स्पर्धांच्या माध्यमातून लहान मुलांच्या कलागुणांना वाव मिळण्याबरोबरच त्यांच्यातील क्रीडा आणि सांस्कृतिक कौशल्यांना प्रोत्साहन देण्याचा मंडळाचा प्रयत्न आहे.

महिलांसाठी विशेष आकर्षण असलेल्या ‘होम मिनिस्टर’ कार्यक्रमाचेही आयोजन करण्यात आले आहे. यामुळे परिसरातील महिलांना आपले कलागुण आणि कौशल्ये सादर करण्याची संधी मिळणार असून, या कार्यक्रमाला मोठा प्रतिसाद मिळण्याची अपेक्षा व्यक्त करण्यात येत आहे.
गणेशोत्सव हा केवळ धार्मिक उत्सव न राहता सामाजिक बांधिलकी जपणारा उत्सव व्हावा, या उद्देशाने मंडळाच्या वतीने नेत्र तपासणी शिबिराचेही आयोजन करण्यात आले आहे. परिसरातील नागरिकांनी या शिबिराचा लाभ घ्यावा, असे आवाहन मंडळाच्या वतीने करण्यात आले आहे.
पत्रा तालीम भागातील महिला, मुले आणि मुलींसाठी या विविध स्पर्धांचे आयोजन करण्यात आले असून, स्पर्धेत सहभागी होऊ इच्छिणाऱ्या स्पर्धकांनी मनोज शेळके व अनिल कांबळे यांच्याशी संपर्क साधावा, असे आवाहन मंडळाचे मार्गदर्शक श्रीकांत घाडगे यांनी केले आहे.

विविध स्पर्धांमध्ये सहभागी होणाऱ्या आणि उत्कृष्ट कामगिरी करणाऱ्या विजेत्या स्पर्धकांसाठी भरघोस बक्षिसांचे आयोजन करण्यात आले आहे. त्यामुळे यंदाच्या गणेशोत्सवात धार्मिक कार्यक्रमांसोबतच सांस्कृतिक, क्रीडा आणि सामाजिक उपक्रमांची रंगत वाढणार असून, पत्रा तालीम परिसरातील नागरिकांना उत्सवाची पर्वणी मिळणार आहे.
मंडळाच्या या उपक्रमामुळे परिसरातील महिला व बालकांना एकत्र येऊन आपले कलागुण सादर करण्याची तसेच विविध स्पर्धांमध्ये सहभागी होण्याची संधी उपलब्ध होणार आहे. गणेशोत्सवाच्या माध्यमातून सामाजिक एकोपा, सांस्कृतिक परंपरा आणि क्रीडा भावना जोपासण्याचा संदेश या उपक्रमातून दिला जाणार आहे.