शहरातील अवैध दारू निर्मिती, विक्री व वाहतूक करणाऱ्यां विरोधात शहर गुन्हे शाखेची कारवाई….

सोलापूर, प्रतिनिधी

सोलापूर महानगरपालिका निवडणूक २०२५ च्या पार्श्वभूमीवर सोलापूर शहरात अवैध दारू निर्मिती, विक्री व वाहतूक करणाऱ्यांविरोधात गुन्हे शाखेने विशेष मोहिम राबवत जोरदार कारवाई केली आहे. पोलीस आयुक्त सोलापूर शहर यांनी दिलेल्या सूचनेनुसार गुन्हे शाखेच्या पथकांनी वेगवेगळ्या ठिकाणी छापे टाकत अवैध मद्य व्यवसायाचा पर्दाफाश केला आहे. दि. ९ जानेवारी रोजी गुन्हे शाखेचे पोलिस उपनिरीक्षक शैलेश खेडकर व त्यांच्या तपास पथकाला मिळालेल्या गोपनीय माहितीच्या आधारे सलगरवस्ती पोलीस स्टेशन हद्दीतील मौजे कवठे येथे कारवाई करण्यात आली.

कुमार ऊर्फ बाबु पांडुरंग चव्हाण याच्या शेतात सुरू असलेल्या गुळमिश्रीत अवैध हातभट्टी दारू गाळण्याच्या भट्टीवर छापा टाकण्यात आला.या कारवाईत १ हजार २८५ लिटर गुळमिश्रीत रसायन व ८० लिटर तयार हातभट्टी दारू असा एकूण ५२ हजार ९७५ रुपयांचा मुद्देमाल जागीच नष्ट करण्यात आला. या प्रकरणी संजय गोपीचंद राठोड, कुमार ऊर्फ बाबु पांडुरंग चव्हाण व प्रियंका कुमार चव्हाण (रा. भोजप्पा तांडा, ता. उत्तर सोलापूर) यांच्याविरोधात सलगरवस्ती पोलीस स्टेशन येथे महाराष्ट्र दारूबंदी अधिनियमान्वये गुन्हा दाखल करण्यात आला आहे.

त्याचप्रमाणे दि. १२ जानेवारी रोजी हॉटेल ॲम्बेसिडर ते प्रभाकर महाराज मंदिर रस्त्यावर अमोल बाळासाहेब भोसले हा देशी-विदेशी दारू विक्रीसाठी नेत असल्याची माहिती मिळाल्यानंतर गुन्हे शाखेने कारवाई केली. त्याच्याकडून १ लाख ०३ हजार ६६० रुपये किमतीच्या दारूच्या बाटल्या व एक दुचाकी जप्त करण्यात आली. या प्रकरणी फौजदार चावडी पोलीस स्टेशन येथे गुन्हा दाखल करण्यात आला आहे, तसेच त्याच दिवशी गांधीनगर, अक्कलकोट रोड परिसरात नरेंद्र रामलू कोंडा हा ऑटो रिक्षातून देशी-विदेशी दारूची वाहतूक करत असल्याचे उघड झाले. कारवाईत १ लाख ३२ हजार ५०० रुपये किमतीच्या दारूच्या बाटल्या व एक ऑटो रिक्षा जप्त करण्यात आली.

एम.आय.डी.सी. पोलीस स्टेशन येथे त्याच्याविरोधात गुन्हा दाखल करण्यात आला आहे, तर कर्णिक नगर येथील स्वतंत्र सैनिक रिक्षा स्टॉपजवळ संदिप विष्णू शिंदे हा दुचाकीवरून दारू विक्रीसाठी नेत असताना पकडण्यात आला. त्याच्याकडून १ लाख १२ हजार ८८० रुपये किमतीच्या देशी-विदेशी दारूच्या बाटल्या व एक मोटरसायकल जप्त करण्यात आली. याप्रकरणी जेलरोड पोलीस स्टेशन येथे गुन्हा दाखल करण्यात आला असून गोल्ड वाईन शॉप, अशोक चौक, सोलापूरच्या मालकाविरोधातही कारवाई करण्यात आली आहे.

ही संपूर्ण कारवाई एम. राज कुमार, पोलीस आयुक्त सोलापूर शहर, डॉ. अश्विनी पाटील, पोलीस उपआयुक्त (गुन्हे/विशेष शाखा), राजन माने, सहा. पोलीस आयुक्त (गुन्हे) आणि अरविंद माने, वरिष्ठ पोलीस निरीक्षक, गुन्हे शाखा यांच्या मार्गदर्शनाखाली पोलिस उपनिरीक्षक शंकर धायगुडे, शैलेश खेडकर, पोसई मुकेश गायकवाड व त्यांच्या तपास पथकातील पोलीस अंमलदारांनी यशस्वीपणे पार पाडली.