प्रभाग ७ मध्ये शांततेत मतदान, चुरशीच्या लढतीनंतर राजकीय सौहार्दाचे दर्शन..
सोलापूर
सोलापूर महानगरपालिका सार्वत्रिक निवडणूक २०२५–२६ अंतर्गत आज शहरातील प्रभाग क्रमांक ७ मध्ये लोकशाही मूल्यांना साजेल अशा वातावरणात शांततेत मतदान प्रक्रिया पार पडली. सकाळपासूनच मतदारांमध्ये उत्साहाचे वातावरण पाहायला मिळाले. महिला, ज्येष्ठ नागरिक तसेच युवकांनी मोठ्या संख्येने मतदान केंद्रांवर हजेरी लावून आपला मतदानाचा हक्क बजावला.
या प्रभागात शिवसेना–राष्ट्रवादी काँग्रेस युतीच्या उमेदवारां आणि भारतीय जनता पक्षाच्या उमेदवारां यांच्यात अत्यंत चुरशीचा सामना पाहायला मिळाला. प्रचाराच्या काळात दोन्ही बाजूंनी जोरदार ताकद लावण्यात आली होती, त्याचे प्रतिबिंब मतदानाच्या दिवशीही दिसून आले. मतदारांमध्ये कोणत्याही प्रकारचा तणाव निर्माण होऊ नये, यासाठी प्रशासनाने विशेष दक्षता घेतली होती.
निवडणूक प्रक्रिया शांततेत पार पडावी यासाठी सोलापूर महानगरपालिका व पोलीस प्रशासनाने कडेकोट बंदोबस्त ठेवला होता. संवेदनशील मतदान केंद्रांवर अतिरिक्त पोलीस फौजफाटा तैनात करण्यात आला होता. मतदान केंद्रांवर प्रवेश, रांगा, ज्येष्ठ व दिव्यांग मतदारांसाठी सुविधा, तसेच ईव्हीएम यंत्रणांची कार्यक्षमता यावर प्रशासनाचे बारकाईने लक्ष होते.
मतदानाची वेळ संपल्यानंतर राजकीय परिपक्वतेचे व सौहार्दाचे चित्र पाहायला मिळाले. शिवसेना–राष्ट्रवादी युतीचे उमेदवार अमोल शिंदे व भाजपचे उमेदवार पद्माकर नाना काळे हे राजकीय मतभेद बाजूला ठेवून एकत्र आले.
दोन्ही प्रतिस्पर्धी उमेदवार एकत्र दिसल्याने नागरिकांमध्ये सकारात्मक संदेश गेला असून, लोकशाहीत स्पर्धा असली तरी परस्पर सन्मान महत्त्वाचा असल्याचे अधोरेखित झाले.
प्रभाग ७ मधील निवडणूक पाहण्यासाठी सोलापूर शहरातील विविध भागांसह जिल्ह्यातील अनेक नागरिक, कार्यकर्ते व राजकीय अभ्यासक सोलापुरात आले होते. त्यामुळे दिवसभर परिसरात राजकीय हालचालींना वेग आला होता. या वेळी भाजपच्या शहराध्यक्ष रोहिणी तडवळकर, तसेच शिवसेना व भाजपच्या विविध पदाधिकारी व कार्यकर्त्यांची मोठ्या संख्येने उपस्थिती होती.
एकूणच प्रभाग ७ मधील मतदान प्रक्रिया कोणत्याही अनुचित घटनेशिवाय शांततेत पार पडल्याने प्रशासन, राजकीय पक्ष तसेच नागरिकांकडून समाधान व्यक्त करण्यात येत आहे. आता सर्वांचे लक्ष मतमोजणीच्या निकालाकडे लागले असून, प्रभाग ७ चा निकाल सोलापूरच्या राजकीय समीकरणांवर प्रभाव टाकणारा ठरेल, अशी चर्चा राजकीय वर्तुळात सुरू आहे.
