आमदार देवेंद्र कोठे यांची जिल्हाधिकारी एस. कार्तिकेयन यांच्या समवेत विकासकामांवर चर्चा

सोलापूर : प्रतिनिधी

शहर मध्य विधानसभेचे आमदार देवेंद्र कोठे यांनी सोमवारी नूतन जिल्हाधिकारी एस. कार्तिकेयन यांची सदिच्छा भेट घेऊन शहर जिल्ह्यातील विविध विकासकामांवर चर्चा केली.

याप्रसंगी आमदार देवेंद्र कोठे यांनी सोलापुरातील आयटी पार्क, शहरातील दोन उड्डाणपूल, मंगळवेढा येथील महात्मा बसवेश्वर महाराजांचे स्मारक तसेच सोलापूर शहरातील कामगारांच्या व सोसायटीचा बी टू चा प्रश्न आदी विषयांवर सकारात्मक चर्चा केली. सोलापूरच्या विविध विकासकामांमध्ये लक्ष घालून कमी कालावधीमध्ये ही विकासकामे आणि सोलापूरकरांच्या मागण्या पूर्णत्वास नेण्याचा विश्वास जिल्हाधिकारी एस. कार्तिकेयन यांनी आमदार देवेंद्र कोठे यांना यावेळी दिला.

आमदार देवेंद्र कोठे म्हणाले, नव्या उमेदीचे जिल्हाधिकारी एस. कार्तिकेयन सोलापूर जिल्ह्यात रुजू झाले आहेत. मुख्यमंत्री देवेंद्र फडणवीस आणि पालकमंत्री जयकुमार गोरे यांच्या माध्यमातून शहर जिल्ह्याचा विकास झपाट्याने होत आहे. हा विकासाचा वेग नूतन जिल्हाधिकारी एस. कार्तिकेयन यांच्या काळात अधिक मोठा होईल, याची खात्री आहे.

याप्रसंगी गुरुशांत धुत्तरगावकर, आदी उपस्थित होते.
————–

कोट
युवा लोकप्रतिनिधी अन अधिकारी

सोलापूर शहर जिल्ह्यातील अनेक लोकप्रतिनिधी आणि अधिकारी युवा आहेत. अधिकाऱ्यांसमवेत एकत्रितपणे काम करून सोलापूर शहर जिल्ह्याच्या विकासासाठी कार्यरत राहू असा विश्वास आहे.
— देवेंद्र कोठे, आमदार, शहर मध्य
———-
चौकट

सोलापूर जिल्ह्यात रुजू झाल्याबद्दल आमदार देवेंद्र कोठे यांनी नूतन जिल्हाधिकारी एस. कार्तिकेयन यांना ग्रामदैवत श्री सिद्धरामेश्वरांची मूर्ती आणि सोलापुरी टॉवेल देऊन सन्मानित केले.