मला फक्त शिकायचं आहे…” — उपमहापौर मॅडमनी स्वतः श्रवण यंत्र देत दिव्यांग हनुमंत मोरे यांना दिला आधार….
सोलापूर
मनात जिद्द, डोळ्यांत स्वप्न आणि ओठांवर आशा… अशा भावनिक वातावरणात दिव्यांग हनुमंत मोरे यांनी सोलापूर महानगरपालिकेच्या उपमहापौर मा. सौ ज्ञानेश्वरी महेश देवकर मॅडम यांची भेट घेऊन आपल्या व्यथा मांडल्या.
उपमहापौर कार्यालयात आलेल्या हनुमंत मोरे यांनी अत्यंत भावनिक शब्दांत आपली परिस्थिती मांडली. “मला फक्त शिकायचं आहे, पुढे जायचं आहे; पण श्रवण यंत्र नसल्यामुळे अभ्यास करताना खूप अडचणी येतात,” असे सांगताना त्यांच्या डोळ्यांत अश्रू दाटून आले. शिक्षणाची तीव्र इच्छा असूनही आर्थिक अडचणींमुळे आवश्यक श्रवण यंत्र घेता येत नसल्याची खंत त्यांनी व्यक्त केली.
तसेच दिव्यांग योजनेअंतर्गत दिलेला प्रस्ताव अनेक दिवसांपासून रखडलेला असल्याचे त्यांनी सांगितले. या योजनेचा लाभ मिळाल्यास आपल्या शिक्षणाला व कुटुंबाला मोठा आधार मिळेल, अशी अपेक्षा त्यांनी व्यक्त केली.
हनुमंत मोरे यांच्या भावना ऐकून उपमहापौर मा. सौ ज्ञानेश्वरी महेश देवकर मॅडम यांनी तत्काळ संवेदनशील निर्णय घेतला. त्यांनी कोणतीही औपचारिकता न ठेवता स्वतः पुढाकार घेत हनुमंत मोरे यांना श्रवण यंत्र उपलब्ध करून दिले. मॅडम यांच्या या कृतीमुळे कार्यालयातील वातावरण भारावून गेले.
श्रवण यंत्र स्वीकारताना हनुमंत मोरे यांच्या डोळ्यांत आनंदाश्रू होते. “आता मी नीट ऐकू शकतो, नीट शिकू शकतो,” असे भावनिक शब्द त्यांनी व्यक्त केले. तसेच योजनेचा प्रस्ताव तातडीने निकाली काढण्यासाठी संबंधित विभागास निर्देश देण्यात आल्याची माहितीही मॅडम यांनी दिली.
“दिव्यांग विद्यार्थ्यांच्या शिक्षणात अडथळा येऊ देणार नाही. समाजातील प्रत्येक घटकाला न्याय मिळवून देणे ही आपली जबाबदारी आहे,” असे उपमहापौर मॅडम यांनी स्पष्ट केले. स्वतः सौ ज्ञानेश्वरी महेश देवकर यांनी तात्काळ बाहेरून श्रवण यंत्र व मशीन घेऊन त्या दिव्यांग बांधवाला अभ्यासासाठी देऊ केले.
यावेळी हनुमंत मोरे यांनी कृतज्ञता व्यक्त करत मॅडम यांच्या कार्याबद्दल स्वागतपर गीत सादर केले. आपल्या भावना गीतातून व्यक्त करत त्यांनी आभार मानले. हा क्षण उपस्थितांसाठी अत्यंत भावनिक आणि प्रेरणादायी ठरला.
उपमहापौर मॅडम यांच्या या संवेदनशील व तात्काळ कृतीमुळे एका दिव्यांग विद्यार्थ्याच्या आयुष्यात नवी आशा निर्माण झाली असून, त्यांच्या शिक्षणाच्या वाटचालीला नवे बळ मिळाले आहे.
