नोंदणीविना हॉस्पिटल चालविल्याप्रकरणी नानजकर हॉस्पिटलवर गुन्हा दाखल

सोलापूर

शहरातील दमानी नगर परिसरातील डॉ. नानजकर यांच्या हॉस्पिटलवर सोलापूर महापालिकेच्या आरोग्य विभागाने मोठी कारवाई करत फौजदारी गुन्हा दाखल केला आहे. महापालिकेच्या आरोग्य अधिकारी डॉ. राखी माने यांच्या पुढाकाराने ही कारवाई करण्यात आली. गेल्या सहा वर्षांपासून आवश्यक नोंदणी व परवाना नूतनीकरण न करता हॉस्पिटल सुरू ठेवल्याचा आरोप संबंधित हॉस्पिटलवर ठेवण्यात आला आहे.

महापालिकेच्या माहितीनुसार, महाराष्ट्र नर्सिंग होम नोंदणी कायद्यानुसार प्रत्येक खासगी हॉस्पिटलला दर तीन वर्षांनी नोंदणीचे नूतनीकरण करणे बंधनकारक आहे. मात्र, नानजकर हॉस्पिटलने २०२० पासून परवाना नूतनीकरण केले नसल्याचे तपासात उघड झाले. यामुळे महापालिकेची सुमारे १ लाख ४० हजार रुपयांची थकबाकीही प्रलंबित असल्याचे समोर आले आहे.

या प्रकरणी आरोग्य विभागाकडून संबंधितांना तीन वेळा नोटिसा बजावण्यात आल्या होत्या. मात्र, कोणतेही समाधानकारक उत्तर न मिळाल्याने प्रशासनाने अखेर कायदेशीर कारवाईचा बडगा उगारला.

दरम्यान, हॉस्पिटलमध्ये नियमबाह्य पद्धतीने वैद्यकीय सेवा देणे, बाहेरील डॉक्टरांना उपचारासाठी परवानगी देणे तसेच बेकायदेशीर प्रॅक्टिस सुरू असल्याच्या तक्रारीही प्रशासनाकडे प्राप्त झाल्या होत्या. त्यामुळे संबंधितांविरोधात फौजदारी गुन्हा दाखल करण्यात आला असून, शहरातील बेकायदेशीर रुग्णालयांविरोधात अशी मोहीम पुढेही सुरू राहणार असल्याचे आरोग्य विभागाने स्पष्ट केले.