राज्यसभेत पार्थ अजितदादा पवार यांची एंट्री; उपराष्ट्रपतींकडून शपथ, देशभरातून शुभेच्छांचा वर्षाव

नवी दिल्ली

राष्ट्रवादी काँग्रेस परिवारासाठी आजचा दिवस अत्यंत अभिमानाचा ठरला असून पार्थ अजितदादा पवार यांनी राज्यसभेच्या सदस्यत्वाची शपथ घेत लोकसेवेच्या नव्या पर्वाची सुरुवात केली. संसद भवनात झालेल्या शपथविधी सोहळ्यात देशाचे उपराष्ट्रपती सी. पी. राधाकृष्णन यांनी त्यांना खासदारकीची शपथ दिली.
या ऐतिहासिक क्षणी पवार यांनी संविधानाप्रती निष्ठा व्यक्त करत देशहित, लोककल्याण आणि विकासाच्या मुद्द्यांवर प्रभावीपणे काम करण्याचा संकल्प व्यक्त केला. त्यांच्या शपथविधीनंतर राष्ट्रवादी काँग्रेस पक्षासह कार्यकर्त्यांमध्ये आनंद आणि उत्साहाचे वातावरण निर्माण झाले.

पार्थ पवार हे युवा आणि अभ्यासू नेतृत्व म्हणून ओळखले जात असून त्यांच्या माध्यमातून संसदेत तरुणांच्या प्रश्नांना योग्य वाचा मिळेल, अशी अपेक्षा व्यक्त होत आहे. रोजगार निर्मिती, पायाभूत सुविधा, शिक्षण, शेती आणि उद्योग क्षेत्रातील विकासाला गती देण्यासाठी ते संसदेत ठोस भूमिका मांडतील, असा विश्वास व्यक्त केला जात आहे.

दरम्यान, त्यांच्या शपथविधीनिमित्त देशभरातून शुभेच्छांचा वर्षाव होत आहे. पंतप्रधान नरेंद्र मोदी, मुख्यमंत्री देवेंद्र फडणवीस, उपमुख्यमंत्री सुनेत्रा पवार तसेच उपमुख्यमंत्री एकनाथ शिंदे यांच्यासह विविध पक्षांच्या लोकप्रतिनिधींनी त्यांचे मनापासून अभिनंदन करत पुढील यशस्वी वाटचालीसाठी शुभेच्छा दिल्या.
राजकारणात नवा उत्साह आणि सकारात्मक बदल घडवून आणण्याची क्षमता असलेले नेतृत्व म्हणून पार्थ पवार यांच्याकडे पाहिले जात आहे. लोकहित, विकास आणि जनकल्याण या तत्त्वांना केंद्रस्थानी ठेवून ते संसदेत प्रभावीपणे कार्य करतील, अशी खात्री त्यांच्या समर्थकांकडून व्यक्त होत आहे.