C CH ऑनलाईन अॅप फसवणूकीच्या खटल्यात व्यापाऱ्यास जामीन
सोलापूर येथील व्यापारी श्री. अनंत प्रकाश येरंकल्लू वय ४७, रा. अशोक नगर, विजापूर रोड, सोलापूर यांची सी.सी.एच. ऑनलाईन अॅपचे माध्यमातुन रु. ९१ लाखाच्या फसवणूकीच्या खटल्या प्रकरणी सोलापूर येथील विशेष न्यायालयाने जामीन मंजूर केला.
यात हकीकत अशी की, जुन २०२२ ते ऑक्टोबर २०२२ या कालावधीमध्ये सोलापूरात सी.सी.एच. ऑनलाईन अॅपच्या नावाखाली बऱ्याच लोकांच्या मोबाईल वर एक आकर्षक गुंतवणूक लाभ दर्शविणारा अॅप येत होता. त्याद्वारे सोलापूरातील एकूण ८३ गुंतवणूकदारांची फसवणूक झाली होती. त्यामध्ये येरंकल्लू बंधूमार्फत गुंतवणूक झाली असा काही गुंतवणुकदारांनी आरोप करुन फिर्याद दाखल केली होती. त्यावर पोलीसांनी गुन्हा दाखल करुन दि. १०/०१/२०२३ रोजी सदर येरंकल्लु बंधु यांना अटक केली होती. पोलीसांनी तपास करुन न्यायालयात आरोपपत्र दाखल केले होते. त्याचा खटला सोलापूर येथील विशेष न्यायालयात सुरु आहे.
सदर बाबत यातील मुख्य आरोपी अनंत प्रकाश येरंकल्लु यांनी अॅड. शशी कुलकर्णी यांच्यामार्फत विशेष न्यायालयात जामीन अर्ज ठेवला होता, त्याची सुनावणी विशेष न्यायालयासमोर झाली. त्यामध्ये आरोपींच्या वकिलांनी असा युक्तीवाद केला की, यातील आरोपी हे स्वतः याप्रकरणात पिडीत (बळी) आहेत. अॅनेटा नावाच्या व्यक्तीने त्यांचीच फसवणूक केली आहे. यातील आरोपीने कोणाचीही फसवणूक केली नाही, आरोपातील गुंतवणूकी एवढीच आरोपीची वैयक्तीक मालमत्ता पोलीसांनी जप्त केलेली आहे, आरोपी दीड वर्षापासुन जेलमध्ये आहे. आरोपी कोठेही पळून जाणार नाही असा युक्तीवाद केला सदर युक्तीवाद विचारात घेऊन विशेष न्यायालयाने समाजातील स्वतंत्र व्यक्तीच्या रु. २ लाखाच्या जामीनावर आरोपीची मुक्तता करण्याचा आदेश पारीत केला.
सदर प्रकरणात आरोपी तर्फे अॅड. शशी कुलकर्णी, अॅड. गुरुदत्त बोरगांवकर, अॅड. स्वप्नील सरवदे, अॅड. आशुतोष पुरवंत, अॅड. अतिश नागणकेरी यांनी काम पाहिले तर सरकारतर्फे अॅड. दत्ता पवार यांनी काम पाहिले.
